Бари фош бўлди: Жиззахда ўқитувчиларининг ойлиги ноқонуний тарзда «Сўғдиёна» клуби ҳисоб рақамига ўтказилган

Халқ таълими вазирининг Ҳуқуқий-назорат хизмати Жиззах вилоятида ўқитувчилардан маҳаллий футбол клуби «Сўғдиёна»нинг моддий-техник базасини мустаҳкамлаш учун 272,15 миллион сўм маблағ йиғилганлигини аниқлади. Бу ҳақда вазирлик ахборот хизмати маълум қилди.

Таъкидланишича, Жиззах вилояти ҳокими 2018 йилнинг 2 ноябрида «Сўғдиёна профессионал футбол клубининг моддий-техника базасини мустаҳкамлаш тўғрисида»ги 360-ф сонли фармойиши қабул қилинган. Мазкур фармойишга асосан жорий йилнинг 3—4 ноябрь кунлари умумхалқ ҳашари ташкил этилган. Фармойишда умумхалқ ҳашари доирасида бошқармалар, идоралар ва бошқа ташкилотларда меҳнат қилаётган ишчи-ходимларнинг бир кунлик иш ҳақи миқдоридаги маблағлари «Сўғдиёна» профессионал футбол клубининг ҳисоб рақамига ихтиёрий равишда ўтказилиши белгиланган.

Қайд этилишича, умумхалқ ҳашари доирасида Жиззах вилояти халқ таълими бошқармаси тасарруфидаги 10 та туман халқ таълими бўлимига қарашли умумий ўрта таълим мактаби ишчи-ходимларидан жами 272 156 729 сўм миқдорида пул маблағлари ишчи-ходимларнинг иш ҳақидан ўтказиб берилган.

Ҳокимнинг бу фармойиши Ўзбекистон Республикаси Вазирлар Маҳкамасининг 2018 йил 10 майдаги 349-сонли «Ўзбекистон Республикасида мажбурий меҳнатга барҳам беришга доир қўшимча чора-тадбирлар тўғрисида»ги Қарорига зид равишда қабул қилинган.

Ҳукумат қарорининг 2-бўлим «а» бандига кўра, умумхалқ ҳашарини ўтказиш тўғрисида фақат Ўзбекистон Президентининг тегишли ҳужжати ёки Ўзбекистон Республикаси Вазирлар Маҳкамасининг Қарори мавжуд бўлгандагина ташкил этиш мумкин.

Халқ таълими Вазирининг Ҳуқуқий-назорат хизмати аралашувидан сўнг Жиззах вилояти ҳокимининг 2018 йил 2 ноябрдаги «Сўғдиёна профессионал футбол клубининг моддий-техника базасини мустаҳкамлаш тўғрисида»ги 360-ф сонли фармойиши 2018 йил 10 ноябрдаги 369-ф-сонли фармойиш билан бекор қилиниши таъминланди.

Хабарда таъкидланишича, «Сўғдиёна» футбол клуби ҳисоб рақамига ноқонуний ўтказилган пул маблағларини қайтариш чоралари кўрилмоқда.