Австралияга борманг! Хитойликларни "яшил қитъа"да жаҳаннам кутяптими?
Кеча ХХР Маданият ва туризм вазирлиги ўз фуқароларига Австралияга бу мамлакатда ирқчилик кайфияти кучайгани сабабли бормасликни маслаҳат берди, деб хабар беради Associated Press шанба куни.
"Вазирлик хитойлик сайёҳларга ўз хавфсизлиги ҳақида кўпроқ ўйлаб кўришни ва Австралияга бормасликни маслаҳат беради", – дейилади агентлик олган маълумотда.
Бунга Австралияда коронавирус пандемияси муносабати билан хитойликлар ва умуман осиёликларга нисбатан ирқий камситиш ва зўравонлик ҳаракатлари кўпайгани сабаб қилиб кўрсатилган.
Агентлик Пекин ва Канберра ўртасида кескинлик кучайиб бораётганини таъкидлади.
Маълумот учун, Австралия ҳукумати CОВИД-19 келиб чиқиши манбалари ва эпидемияга қарши чоралар бўйича халқаро текширув ўтказишга чақирди. Шу билан бирга, Австралия бош вазири Скотт Моррисон, вирус, шубҳасиз, Хитойда пайдо бўлганлигини ва халқаро ҳамжамият коронавируснинг пайдо бўлиши ҳолатларини аниқлаштириши кераклигини таъкидлади.
Ўз навбатида, Хитой Австралиядан арпа етказиб бериш учун 80 фоизлик божни ундирди, Канберрани арпа ишлаб чиқаришга берилган субсидиялар туфайли Жаҳон савдо ташкилотининг қоидаларини бузганликда айблади. Бунгача ХХР маъмурлари Австралиядаги тўртта йирик гўштни қайта ишлаш корхоналаридан мол гўшти импортини тўхтатиб қўйганди.
Хитойнинг Австралиядаги элчиси Чэн Цзинье, шунингдек, Канберрага унинг коронавирус бўйича терговни Австралия ҳукумати учун мақбул бўлган форматда олиб боришга уриниши хитойликларнинг Австралиядаги маҳсулотларини бойкот қилиши ва хитойлик сайёҳлар ҳамда талабаларнинг ушбу мамлакатга боришни рад этишига олиб келиши мумкинлиги ҳақида огоҳлантирган.
Аввалроқ Жаҳон соғлиқни сақлаш ташкилоти CОВИД-19 пандемиясига халқаро ҳамжамият қандай муносабатда бўлганлигини тизимли таҳлил қилишга чақирувчи резолюцияни қабул қилган эди. Бироқ, вируснинг келиб чиқиш сабабларини ўрганиш ҳақида гаплашилмади.
