Австралияда қулупнай ичида игналар топилмоқда

9 сентябрдан Австралияда бир нечта мевалар партиясидаги қулупнай ҳосили ичида игна топила бошланди. Бундай илк ҳолатлар Квинсленд штатида қайд қилинган: бу ерда қулупнай егандан кейин шифохонага тушиб қолган маҳаллий фуқародан шикоят олинган. У дўстлари билан бошқа қулупнайларни текшириб, улардан биридан яна битта игна топган.

Игналар билан боғлиқ яна иккита ҳодиса ҳақида 17 сентябрда маълум бўлган. Виктория ва Жанубий Янги Уэльс штатлари вакиллари супермаркетларда қулупнайни текширишганда ундан игна аниқлашган. Австралияликлар ижтимоий тармоқларда қулупнайни истеъмол қилишдан олдин уни кесиб кўришни ёки игналар оғиз, томоқ ва ички аъзоларга шикаст етказмаслиги учун ундан пюре тайёрлашни тавсия қилишмоқда.   

Полиция ушбу ҳолат юзасидан тергов бошлаб, бутун Австралиядан 7 та ишлаб чиқарувчи гумон остига тушаётганини аниқлаган. Бу компаниялар мамлакатнинг аксарият дўконларига қишлоқ хўжалиги маҳсулотлари етказиб беради ва шу сабабли барча 6 та штатга огоҳлантириш юборилган.

Квинсленд маъмурияти қулупнайларга игна тиқиб қўйилиши ҳақида бирор ахборот берганлик учун 100 минг Австралия доллари (72 минг доллар) тўлашга ваъда берган.

Полициянинг фикрича, игналар қулупнайларга нафақат бирламчи жиноятчилар, балки уларга тақлид қилаётганлар томонидан ҳам тиқиб қўйилмоқда. Маҳаллий аҳоли қулупнайни юваётганда ундан ўткир тиғли буюмлар тушгани билан боғлиқ бир неча ҳодисани маълум қилган. Баъзилар эса бундай буюмларни банан ва олмаларда аниқлашган. Шу сабабли деярли барча меваларни ейишдан олдин кесиб кўриш тавсия қилинмоқда.

Мамлакатдаги аксарият дўконлар қулупнай сотишдан бош тортмоқда. Австралиянинг қулупнай етиштирувчилари уюшмаси маҳсулотларни текшириш чоралари кучайтирилгани, жумладан игналарни аниқлаш учун металл қидиргичлар ўрнатаётганини маълум қилган. 

Тергов қуйидаги тахминни билдирмоқда: фермерлардан бири шахсий сабабларга кўра бир нечта қулупнай партиясида игналар яшириб қўйган. Бу қулупнай эса мамлакатнинг исталган шаҳрига етказилган бўлиши мумкин. Ҳозирча ушбу ҳолат юзасидан бирорта гумонланувчи маълум қилинмаган. Таъкидланишича, жиноятчига ушбу қилмиши учун 10 йилгача қамоқ жазоси берилиши мумкин.

Manba: kun.uz