Аргентина гуруҳдан чиқа оладими? Барча вариантлар
Аргентина терма жамоаси ЖЧ-2018 гуруҳ босқичининг 2-тури доирасида Хорватияга йирик ҳисобда ютқазиб қўйганидан кейин плей-оффга чиқиш имкониятини пасайтириб юборди. Аргентиналиклар 2та турдан сўнг 1 очко билан гуруҳда 3-ўринни эгаллаб туришибди. Хорватия эса нимчорак финал йўлланмасини қўлга киритиб бўлди. Қолган битта йўлланма учун 3та терма жамоа даъвогарлик қилмоқда.
Месси жамоадошларининг тақдири эртага бўлиб ўтадиган Нигерия - Исландия ўйинига боғлиқ бўлиб қолмоқда. Вариантларни кўриб чиқамиз.
1) Исландия Нигерияни мағлуб этса:
Бу ҳолда исландияликларнинг очкоси 4тага етади ва Аргентинанинг имконияти кескин пасайиб кетади. Сампаоли шогирдлари сўнгги турда Нигерияни мағлуб этишдан ташқари, параллел кечадиган ўйинда Исландиянинг Хорватияга ютқазишини кутишга мажбур. Ушбу натижалар қайд этилса, Аргентина ва Исландиянинг очколари тенглашади. Бундай ҳолатда тўплар нисбатига қаралади. Шу боис, жанубий америкаликлар сўнгги турда йирик ҳисобда ғалаба қозонишлари талаб этилади. Тўплар нисбати бир хил бўлиб қолса, фейр-плей қоидаси орқали плей-оффга чиқадиган жамоа номи аниқланади. Аргентинада эса сариқ карточкалар етарли.
2) Нигерия Исландияни мағлуб этса:
Мана шу вариант Аргентина учун қулайроқ. Боиси, Месси жамоадошлари сўнгги турда Нигерияни мағлуб этиб, 2-ўринни эгаллашлари мумкин. Албатта, Исландия ҳам 3-турда Хорватияни мағлубиятга учратиб, ўз очколарини 4тага етказиши мумкин. Бундай ҳолатда ҳам юқоридаги тўплар фарқи ва фейр-плей қоидасига ишга тушади.
3) Нигерия Исландия билан дуранг ўйнаса:
Бундай ҳолатда исландларнинг очкоси 2тага етади. Аргентина сўнгги турда Нигерияни мағлуб этиши ва Исландиянинг Хорватияга қарши ўйинда очко йўқотишини кутишга мажбур.
Ҳар учала вариантда ҳам кўп нарса хорватларга боғлиқ бўлиб қолади. Сўнгги турда Модрич ва Ракитич жамоадошлари Исландияни мағлуб этиб беришса (иложи бўлса йирик ҳисобда), Аргентинада кейинги босқичга чиқиш имконияти ошади. Шунда ҳам Сампаоли шогирдлари 3-турда Нигерияни мағлуб этишлари шарт эканини унутмаслик лозим.
Манба: stadion.uz
