АҚШнинг Россиядаги элчихонаси сайти блокланиши лозим — депутат

Россия Давлат думаси депутати Бийсултон Ҳамзаев АҚШнинг Россиядаги элчихонаси сайтини блоклашга чақирди. Унинг сўзларини РИА Новости келтирмоқда.

«Биз Россияда бундай ресурсларни йўқ қилиш бўйича режалаштирилган ишларни давом эттиришимиз керак. Мен АҚШнинг Россиядаги элчихонаси сайтига эътибор берган бўлардим. Кўп сонли обуначиларим у ерда дипломатик миссия маъмурлари эълон қилаётган маълумотларни кескин танқид қиладилар. Айниқса, рус тилида», - деди у ва бундай ресурсларни Россияга душман деб билишини айтди.

Шу муносабат билан парламентарий мамлакатдаги Америка элчихонаси веб-сайтини блоклашни зарур деб ҳисоблади. Депутатнинг сўзларига кўра, у ушбу масала юзасидан Россия Ташқи ишлар вазирлиги ва Роскомнадзорга сўров билан мурожаат қилмоқчи.