АҚШда ўқитувчи ишдан четлатилди, у...

АҚШнинг Нью-Жерси штатида мусулмон ўқувчилардан бирини террорчи деб атаган математика ўқитувчиси текширув тугагунга қадар ишдан четлатилди.

Воқеа Берген шаҳридаги Рижфилд мемориал мактабида содир бўлган.

Араб миллатига мансуб ўн етти ёшли Муҳаммад Зубий дарс пайтида ўқитувчи томонидан камситилган: “Вазифани уйда тугатсак бўладими?” деган саволига ўқитувчи “Биз террорчилар билан савдолашмаяпмиз”, дея жавоб қайтарган.

Рижфилд мактабининг вақтинчалик инспектори Летиция Пантолиано ўқувчилар ёки ходимларнинг камситиши мумкин эмаслигини таъкидлади. “Биз ўқувчилар ва ходимларнинг ирқий, диний ва этник ўзига хослигини қабул қиладиган муҳитни яратишга ҳаракат қилмоқдамиз”, – деди у.

Шунингдек, Пантолиано мактаб раҳбарияти математика ўқитувчисини жавобгарликка тортиш учун барча қонуний воситалардан фойдаланишга тайёрлигини маълум қилди.