АҚШда соқчилар маҳбусни ўлдириб қўйди
АҚШнинг Бруклин федерал қамоқхонасида маҳбус Жамол Флойд қамоқхона маъмурлари унга қарши қалампир пуркагич ишлатганидан сўнг вафот этди, деб хабар беради New York Post қамоқхона бюросининг баёнотига таяниб.
Қамоқхона бюроси вакилининг сўзларига кўра, 3 июнь, чоршанба куни эрталаб соат 10 ларда (Тошкент вақти билан соат 7.00 атрофида) маҳбус Жамол Флойд камера ойнасини металл буюм билан уриб синдирган, шу сабабли соқчилар қалампир пуркагичидан фойдаланишган, шундан сўнг Флойд ҳушини йўқотган.
Тиббий ходимлар аввал унга биринчи ёрдам кўрсатишга ҳаракат қилишди, кейин Флойд маҳаллий касалхонага етказилди. Сўнг касалхонада вафот этди. Ўлимнинг аниқ сабаблари ҳанузгача аниқланмоқда, дея қайд этади газета.
"ФҚБ ва АҚШ суд ижрочилари хизмати хабардор қилинди. Ходимлар ва бошқа маҳбуслардан ҳеч ким жабрланмади", — деди бюро.
Маълумот учун, Миннеаполисда афро-америкалик Жорж Флойд полициячининг айби билан вафот этгач, норозилик намойишлари бошланганди. Кейинроқ бу намойиш АҚШни қамраб олди.
