АҚШ ҳукумати Эрон режимига ёрдам бергани учун Туркиянинг Golden Global банки ва унинг икки молиявий шўъба корхонасига санкциялар жорий қилди.

Санкциялардан сўнг банклар долларда операциялар амалга ошириш имкониятидан маҳрум бўлади.

Golden Global Туркияда АҚШнинг амалдаги «Иқтисодий изгой» кампанияси доирасида санкцияга учраган биринчи молиявий ташкилот бўлди. Банк мамлакатда капитал ҳажми бўйича 35-ўринда туради.

Golden Global Эрон ва Хитой ўртасидаги молиявий операцияларга ҳам хизмат кўрсатган. Шу боис Вашингтоннинг мазкур қарори Эрон билан савдо қилувчи бошқа Туркия компаниялари ва уларнинг хитойлик ҳамкорларига ҳам сигнал сифатида баҳоланмоқда.

АҚШ Молия вазири Скотт Бессент аввалроқ «Иқтисодий изгой» операцияси бошланганини эълон қилган эди. Унинг мақсади Эрон иқтисодиётини жаҳон молиявий тизимидан максимал даражада ажратиш экани айтилган.

АҚШ Молия вазирлиги яқинда Эронга ядровий ва ракета технологияларини олишда ёрдам бераётгани айтилган 60 дан ортиқ компания, шахс ва кемаларга ҳам санкциялар жорий қилган.