"АҚШ Конгресси делегациясининг Тайванга ташрифи провокация"
Россия Ташқи ишлар вазирлигининг Иқтисодий ҳамкорлик департаменти директори Дмитрий Биричевский “Россия 24” телеканалида АҚШ Конгресси делегациясининг Тайванга ташрифи провокацион эканлигини айтди.
“Россиянинг позициясини сиз жуда яхши биласиз, у юқори даражада ҳам, вазиримиз томонидан ҳам бир неча бор айтилган. Биз Нэнси Пелосининг Тайванга ташрифи ва у ерга АҚШ конгрессменларининг навбатдаги ташрифини провокацион деб биламиз”, — дея унинг сўзларини келтиради “ТАСС”.
Унинг таъкидлашича, Қўшма Штатларнинг бундай қадамлари вазиятни барқарорлаштиришга ҳисса қўшмайди ва Осиё-Тинч океани минтақасида кескинликни кучайтирмоқда.
"Ва, албатта, бу муқаррар равишда иқтисодиётга таъсир қилади", дея қўшимча қилди у.
Аввалроқ Хитойнинг Россиядаги элчиси Чжан Ханхуй АҚШ Конгресси Вакиллар палатаси спикери Нэнси Пелосининг Тайванга ташрифидан сўнг кўрсатилган қўллаб-қувватлаш учун Москвага миннатдорлик билдирганди.
