АПЛда энг кўп легионер қайси жамоада?
Brexit жараёни туфайли (Буюк Британиянинг Европа Иттифоқидан ажралиб чиқиши) Англия Премьер-Лигасида легионер футболчиларга чеклов қўйилиши мумкинлиги ҳақидаги хабарлар пайдо бўлгач, табиийки, журналистлар АПЛ жамоалари таркибидаги чет эллик футболчилар сонига эътибор қаратишди.
Ҳозирда Премьер Лигада етакчилик қилаётган «Манчестер Сити» бу борада ҳам етакчи – Гвардиола ихтиёрида 17 нафар британиялик бўлмаган футболчи бор. Шунингдек, «Тоттенҳэм», «Брайтон», «Уотфорд» ва «Ҳаддерсфилд» жамоалари таркибида ҳам шунчадан легионер мавжуд.
«Ливерпуль», «Челси» ва «Арсенал»да чет эллик футболчилар сони 16 нафардан, топ-6 ичида энг кам легионер футболчига эга бўлган жамоа эса, «Манчестер Юнайтед» – 14 нафар.
Ҳозирда турнир жадвалида 6-ўринда бораётган «Борнмут» эса, Лигада энг кам чет эллик футболчини ўйнатмоқда. Эдди Хау жамоаси таркибида фақат 5 нафар легионер бор холос.
Аслида, анча йиллардан бери АПЛ маҳаллий футболчиларни қўллаб-қувватлаш мақсадида легионерларга чеклов қўйиш ҳақида ўйлаб келади, аммо Европа Иттифоқи қонунларига кўра, ушбу Иттифоқ таркибига кирувчи мамлакатлар паспортига эга бўлган шахснинг меҳнат фаолиятига чеклов қўйилиши мумкин эмас. Аксарият, ҳатто Лотин Америка ёки Африка қитъасидан келган футболчиларда ҳам бирор бир ЕИ давлатидан иккинчи паспортлари бор.
Британиянинг ЕИдан чиқиши футбол амалдорларини боғлаб турган кишанлардан халос қилиши мумкин.
Маълумотларга қараганди, ҳар бир клуб заявкасида фақат 12 нафар легионер бўлиши мумкинлиги мунозара қилинмоқда. Ёки АПЛда қатнашиш учун футболчи олиши керак бўлган лицензия талабларини янада қийинлаштириш орқали ҳам легионерларни камайтириш мумкин.
Manba: kun. uz
