Ана холос! Президенти тадбирларда иштирок этиш ўрнига ухлашни афзал кўрди

Филиппин президенти Родриго Дутерте Сингапурда Жануби-Шарқий Осиё давлатлари уюшмаси (АСЕАН) саммитининг бир нечта тадбирларида иштирок этиш ўрнига ухлашни афзал кўрди. Бу ҳақда "Кун" нашри маълум қилди. 

Дутерте ҳаммаси бўлиб 5 та тадбирни ўтказиб юборган ва уларга бормаганини ухлаб олишга қарор қилгани билан тушунтирган. Унинг айтишича, натижада у барибир тўйиб ухлай олмаган, бироқ иш кунини ўтказиб олган. “Ухлаб олган бўлсам нима бўлибди?”, деб таажжубланган 73 ёшли президент. 

Филиппин мухолифатидан сенатор Антонио Трийанес Дутертенинг бу ишини танқид қилиб, президентнинг учрашувларга бориш ўрнига кунига бир неча марта ухлаб олиши хавотир уйғотишини айтган. “Бу икки нарсани англатиши мумкин: ёки у ўз мажбуриятларини бажриш учун жуда кексалик қилади, ёки бу шунчаки дангасалик ва масъулиятсизлик. Ҳар қандай вазиятда, бу давлатимиз учун катта муаммо”, деб айтган мухолифатчи.

Филиппин етакчиси ўзининг кескин сўзлари ва “андиша қилиб ўтирмаслиги” билан маълум бўлиб, сентябрда мамлакатда наркобизнесга қарши кампания вақтида одамларни судловсиз ўлдирганини тан олган.