Ана холос! Буюк Британия коронавирусга қарши чораларни қайтадан кучайтиради
Коронавирус юқтирганлар сони кўпайиб бораётгани сабабли Буюк Британия ҳукумати олтидан ортиқ кишидан иборат гуруҳларнинг ёпиқ ва очиқ жойларда тўпланишига тақиқ қўйди. Таъқиқ 14 сентябрдан кучга киради, дея хабар берди «Интерфакс».
Мазкур тақиқ мактаб ва ишхоналар, шунингдек, COVID-хавфсиз тўйлар, дафн маросимлари ва спорт тадбирларига тааллуқли эмас. Бундан ташқари, чекловлар қариндошларидан алоҳида, ёлғиз яшайдиган фуқароларнинг оилавий учрашувлари учун ҳам тааллуқли эмас.
Қоидабузарларга 100 фунт миқдорида жарима солинади, қоидабузарликлар сони ортиши билан жарима миқдори ошиб бораверади ва жарима миқдори 3200 фунтга етиши мумкин.
Сентябрь ойи бошидан бери мамлакатда касалланиш суръати кескин ўсди. 8 сентябрь куни 2460 та янги коронавирус ҳолати аниқланган бўлса, август ойида энг юқори кўрсаткич кунига 1522 тани ташкил этаётган эди.
Умуман олганда, пандемия бошланганидан бери мамлакатда 354,9 мингдан ортиқ ҳолатлар рўйхатга олинган, шулардан 41,6 мингдан ортиқ инсон вафот этган.
