“Аллоҳга шукр, биз етиб келдик”: БААлик биринчи фазогир орбитадан юртдошларига салом йўллади (видео)
БААлик биринчи фазогир Ҳазза ал-Мансурий “Союз МС-15” кемасининг Халқаро коинот станциясига туташганидан кейин юртдошларига салом йўллади.
Кема ХКСга туташгандан кейин экипаж люкни очиб, станцияга ўтган. Олег Скрипочка, Жессика Меир ва ал-Мансурийни станцияда 6 фазогир – Алексей Овчинин, Александр Скворцов, Кристина Кук, Ник Хейг, Эндрю Морган ва Лука Пармитано кутиб олган.
#فيديو | لحظات تاريخية لدخول #هزاع_المنصوري #أول_رائد_فضاء_إماراتي إلى محطة الفضاء الدولية #طموح_زايد #وام pic.twitter.com/Uzo8LK2gkW
— وكالة أنباء الإمارات (@wamnews) September 25, 2019
Ал-Мансурий Дубайдаги коинот марказидаги парвозни бошқариш хонаси билан алоқага чиқиб, “Аллоҳга шукр, биз етиб келдик”, деган.
“Ҳаммаси яхши кетмоқда, менинг БАА аҳолисига саломим”, деб қўшимча қилган фазогир.
Ал-Мансурий, шунингдек, парвоз вақтида “Ердаги ажойиб қуёш ботишлар ва тонг отишлар манзараларини” кўрганини айтган.
“Мен кўрганларимни сиз билан бўлишишни истардим”, деб қўшимча қилган БААлик фазогир.
Ал-Мансурий биринчи араб ва БААлик фазогир бўлди. У Ерга 8 кундан кейин, 3 октябрда қайтади.
Шунингдек, БААнинг фазога жўнатиладиган иккинчи фазогири номи маълум бўлди. Бу инсон муҳандис Султон ан-Ниёзий бўлади. Бу ҳақда журналистларга БАА коинот агентлиги директорлар кенгаши раиси маълум қилди. Ан-Ниёзий ал-Мансурийнинг дублёри ҳисобланади.