Alibaba асосчиси "йўқолган" бўлиши мумкин - ОАВ

Alibaba асосчиси "йўқолган" бўлиши мумкин - ОАВ

Хитойнинг энг бадавлат инсонларидан бири - Alibaba асосчиси, миллиардер Жек Манинг "ғойиб бўлгани" ҳақида хитой ижтимоий тармоқларида тарқалган миш-мишлар хорижий ОАВларгача етиб борди.

Хабарларда аниқлик киритилишича, Жек Ма - Хитой молиявий регуляторлари фаолиятини танқид қилган ва ХХРнинг технологик компанияларга қарши олиб бораётган сиёсатига қарши чиққан пайтдан - аниқроғи, октябрь ойи охиридан эътиборан омма олдида кўриниш бермаган.

Ушбу ҳафтада Telegraph, Forbes, Financial Times, CNN, Fox, ABC телеканаллари ва кўплаб бошқа нашрларда: "Миллиардернинг ғойиб бўлиши", "Жек Ма қани?", "Жек Ма йўқолдими?" деган сарлавҳалар акс этган хабарларни кўриш мумкин.

ABC телеканали маълумотларига кўра, миллиардер омма қаршисида кўриниш бермаганига икки ойдан ошган. Уни охирги марта 31 октябрда кўришган, ўшанда Жек Ма тўғридан-тўғри эфирда намойиш этилган Alibaba тадбирида иштирок этган.

Айрим хабарларга кўра, дея таъкидланади телеканал хабарида, ўзининг Africa's Business Heroes шоуси шов-шувли финал босқичини ҳам ўтказиб юборган. Гарчи шоуда у бош ҳакам ролини ижро этиши кутилган бўлса-да. Сал аввал Жек Ма финал босқичини сабрсизлик билан кутаётгани ҳақида айтган бўлган.

Хитой ижтимоий тармоқларида Жек Ма ҳозирда бўлиши мумкин бўлган жой хусусида турли миш-мишлар тарқалмоқда, интернет фойдаланувчилари унинг ғойиб бўлишини 24 октябрь куни бўлиб ўтган саммитда сўзлаган жанжалли нутқи билан боғлашмоқда, деб ёзади телеканал.

Декабрь ойида Бозорни назорат қилиш ва тартибга солиш бўйича ХХР бош давлат бошқармаси Alibaba компаниясига нисбатан монополияга қарши суриштирувни бошлаб юборган.


Матнда хатолик топсангиз, ўша хатони белгилаб, бизга жўнатинг (Ctrl + Enter).

Бўлимга тегишли қизиқарли хабарлар

Фикр билдириш учун қайдномадан ўтишингиз сўралади ва телефон ракамни тасдиклаш керак булади!