"Акахоним бор": Хоразмлик фирибгарнинг "ов"и фош бўлди

Бир неча бор судланиб, қилмишидан тўғри хулоса чиқармаган қўшкўпирлик И.Фарид ҳали жазо муддати тугамай яна жиноятга қўл урди. У Ҳазорасп туманида яшовчи Каримбойнинг “мойлироқ” жойга ишга кирмоқчи эканлигини эшитиб, уни “тузоғи”га осонгина илинтирди. “Тепа”да ишни қўл учида битирадиган акахони борлигини айтиб, уни ишонтирди.

Хуллас, ҳаром луқма ейишга одатланган бу кимса бир йил давомида Каримбойнинг 4600 АҚШ доллари ҳамда 3480000 сўм пулини қўлга киритиб, ўз эҳтиёжи учун сарфлаб юраверди. Фирибгарнинг пуч ваъдаларига ишонган Каримбой эса шундан кейин ҳам яна бир неча ой кутди. Аммо ишдан дарак бўлмади. Шундан сўнг у ҳуқуқни муҳофаза қилувчи идораларга мурожаат қилди. Бировнинг ҳаққи буюрмас, деганларидек, Фарид тергов жараёнида жабрланувчига етказган зарарни тўлиқ қоплашга мажбур бўлди.

Жиноят ишлари бўйича Ҳазорасп тумани суди фирибгарлик билан шуғулланиб, ўзгалар мулкини қўлга киритган И.Фаридни 5 йил муддатга озодликни чеклаш жазосига ҳукм қилди.

Акбар АМИНОВ,

Жиноят ишлари бўйича Ҳазорасп тумани суди раиси.

 Худойберган ЖАББОРОВ,

 “Postda” мухбири.