Афғонистон ҳарбийлари дунёда фаолияти тақиқланган «ИШИД» жангариларини йўқ қилиш операциясини бошлади…
Ушбу операция Афғонистоннинг Нангархар вилоятида, Покистон билан чегарадош ҳудудда бошлнган. Операцияга Америка ҳарбий кучлари етакчилик қилмоқда.
8 июль куни Америка етакчилигидаги афғон қўшинлари Хаска-Мин уездида жангариларнинг асосий пунктларидан бирини йўқ қилгани ҳақида хабар тарқатилган. Жангарилар Нангархар вилоятига қарашли шу пунктдан туриб Қобулга ҳужум уюштиришни мўлжаллашганди. Демак, уларнинг режаси йўққа чиқди. Худди ўша куни Америка қирувчи самолётлари дунёда фаолияти тақиқланган «ИШИД» террор гуруҳи таркибидаги «Буюк Хуросон» деб номланган жангарилар гуруҳини ҳам бомбардимон қилган. Натижада 4 нафар жангари йўқ қилинган.
Худди шу кичик гуруҳ Қобулда бир нечта террор ҳаракатларини амалга оширишга ҳам улгурган. Гуруҳ аъзолари сони тахминан 2 минг кишидан иборат.
Тожикистон президенти Имомали Раҳмон айтиб ўтдики, ўнлаб тожик миллатига мансуб жангарилар Ироқ ва Суриядан Афғонистонга ўтиб кетгани ҳақида маълумотлар бор. Уларнинг аксарияти хорижга пул топиш ниятида боргач, турли экстремистик ячейкалар вакилларининг таъсирига тушган ва жангари каллакесарга айланиб хунрезликларни амалга оширишга берилган. Президентнинг айтишича, жангари гуруҳларнинг умри қисқа. Яқин ойлар ичида албатта улар Афғонистон ҳарбийларининг ғазабига учрайди ва ер юзидан супуриб ташланади.
