Адвокат: "Марадонанинг саккиз нафар меросхўри ўртасида кураш бошланиши мумкин"

Диего Марадонанинг мероси учун мураккаб ва «ифлос» кураш юзага келиши мумкин, деб ёзмоқда Reuters агентлиги. Агентликнинг маълумот беришича, ундан қолган мол-мулкни олти аёлдан бўлган саккиз фарзанди талашиши мумкин.

Марадонанинг адвокати Матиас Морланинг сўзларига кўра, собиқ футболчининг Аргентинада тўрт, Италияда бир ва гиёҳвандликдан даволанган Кубада уч нафар фарзанди бор. 

«Марадона ажрашган бўлиб, унинг саккиз фарзанди бор эди. Шу боис унинг мол-мулки саккизга бўлинади. Бу мураккаб жараён бўлади», — деди футбол адвокати Мартин Аполо Reuters билан суҳбатда.

 Одатда бу жараён 90 кун давом этади, бу давр ичида меросхўрлар ўз ҳуқуқларини талаб қилишлари мумкин. Аммо «ички низолар» ва мерос талаб қиладиган оппортунистлар сабабли Марадона билан боғлиқ ҳолатда жараён узоқ давом этиши мумкин, деб тахмин қилди Аполо.

 Reuters агентлигининг ёзишича, Марадонанинг мероси кўчмас мулк, «ақлли» автомобиллар, инвестициялар ва турли мамлакатларда олган қимматбаҳо совғалардан иборат.  Масалан, Марадона Fujairah футбол клубининг техник директори бўлиб ишлаган Дубайда унга иккита қимматбаҳо автомобил совға қилинган, Беларуснинг «Динамо-Брест» клуби фахрий президенти бўлганида эса Overcomer вездеходи тақдим этилган.

Марадонанинг меросхўрлари учун унинг образига бўлган ҳуқуқ, бундан ташқари, кимошди савдолари орқали сотиш мумкин бўлган футболкалари катта қийматга эга, деб ҳисоблайди Мартин Аполо.

 Диего Марадона 25 ноябрда 60 ёшида ҳаётдан кўз юмди. Дастлабки маълумотларга кўра, унинг ўлимига юрак хуружи сабаб бўлган. Футболчининг вафоти туфайли Аргентинада 3 кунлик мотам эълон қилинган.