544 миллион сўмлик велосипед эҳтиёт қисмларини яширинча олиб кириш режаси чиппакка чиқди
Товар-моддий бойликларни божхона назоратидан четлаб олиб ўтишга бўлган уринишларга қарши божхона органлари томонидан тизимли равишда кураш олиб борилмоқда.
Жумладан, Давлат божхона қўмитаси Контрабанда ва божхона қонунчилиги бузилишига қарши курашиш бошқармаси Фарғона вилояти божхона бошқармаси ходимлари билан ҳамкорликда Фарғона вилояти ҳудудида тезкор тадбир ўтказишди.
Тадбир давомида юртимизда фаолият олиб бораётган масъулияти чекланган жамиятлардан бирининг номига хориждан олиб келинган контейнерлардаги велосипед эҳтиёт қисмлари ўрнатилган тартибда божхона кўригидан ўтказилди.
Текширув давомида, умумий қиймати 544,1 миллион сўмлик 16 525 дона велосипед покришкалари, 27 200 дона камералар ва 3 650 дона насослар декларацияда кўрсатилганидан ортиқча эканлиги аниқланди.
Ҳозирда юқоридаги ҳолат юзасидан божхона органлари томонидан суриштирув ҳаракатлари давом эттирилмоқда.
