15 июлдан бошлаб Россия Федерацияси COVID-19 сабабли чегарадан ўтишга қўйилган чекловларни олиб ташлайди
Россия 15 июлдан бошлаб COVID-19 тарқалиши муносабати билан чегарадан ўтишга қўйилган чекловларни бекор қилмоқда, деб хабар берди мамлакатга янги коронавирус инфекцияси олиб кириши ва тарқалишининг олдини олиш бўйича тезкор штаб.
“Муҳокама якунлари бўйича тезкор штаб 2022 йил 15 июлдан бошлаб Россия Федерацияси давлат чегарасини кесиб ўтишда эпидемик сабаб бўлган ҳукумат қарорлари билан ўрнатилган вақтинчалик чекловларни бекор қилиш тўғрисида қарор қабул қилди”, деди душанба куни тезкор штаб журналистларга.
Бундан ташқари, штаб Белоруссия фуқаролари учун Россияга ҳаво орқали келганида COVID-19 учун ПЦР тести натижаларини тақдим этиш талабини бекор қилишга қарор қилди. Роспотребнадзор раҳбарининг қарорига тегишли ўзгартиришлар киритилади.
“Бошқа фуқаролар учун ПЦР тести натижаларини тақдим этиш талаблари сақланиб қолмоқда”, — дейилади штаб хабарида.
Штабнинг эслатишича, эпидемиологик вазиятнинг яхшиланиши муносабати билан 14 июндан бошлаб чет эл фуқароларининг Россияга ҳаво ва денгиз назорат-ўтказиш пунктлари орқали киришига қўйилган чекловларни бекор қилиш тўғрисида қарор қабул қилинган, бироқ қуруқликдаги транспорт орқали киришга бир қатор чекловлар амалда давом этганди.
