1 июлдан Туркияда комендантлик соати тўлиқ бекор қилинади
Туркия президенти Ражаб Тоййиб Эрдўғон мамлакатда 1 июндан коронавирус фонида қўйилган чекловларнинг бир қисми бекор қилинишини эълон қилди, деб ёзади «РБК».
«1 июлдан бошлаб комендантлик соатини бутунлай бекор қиламиз», — деди Эрдўғон.
Бундан ташқари, шаҳарлараро ҳаракатланиш ва шаҳар жамоат транспортидан фойдаланишга қўйилган чекловлар бекор қилинади.
Эрдўғоннинг таъкидлашича, вакцинация мамлакат учун асосий мақсад бўлиб қолмоқда. Унинг сўзларига кўра, Туркияда 43 миллиондан ортиқ дозада коронавирусга қарши вакциналар ишлатилган. Давлат раҳбари бир неча ҳафта ичида 18 ёшдан катталарни эмлашни якунлаш ниятида эканини эълон қилди.
Туркия Соғлиқни сақлаш вазирлигининг маълумотларига кўра, ўтган кун давомида мамлакатда COVID-19’га чалиниш бўйича 5,2 мингта янги ҳолат қайд этилди, 51 киши касалликдан вафот этди.
