Президентликка номзод Литвада. Нега у ерга кетди?
Беларусь президентлигига номзод Светлана Тихановская озодликда ва у ҳозирда Литвада. Бу ҳақда Литва ТИВ раҳбари Линас Линкявичюс ўзининг "Twitter"даги саҳифаси орқали маълум қилди.
Светлана Тихановскаянинг штаби 10 август куни кечаси у Беларусь Марказий сайлов комиссиясига борганидан сўнг йўқолиб қолгани тўғрисида маълум қилганди. Кечга яқин Тихановская алоқага чиққан, бироқ қаерда эканлигини ошкор этмаган.
Тихановскаянинг матбуот котиби Анна Красулинанинг маълум қилишича, у Марказий сайлов комиссиясига ташрифидан сўнг «қарор қабул қилган» ва мамлакатдан чиқиб кетган. Красулина қандай қарор тўғрисида гап кетганига изоҳ бермаган.
Эслатиб ўтамиз, Беларусда 9 август, якшанба куни президент сайлови бўлиб ўтди. Пойтахт Минскда президент сайловидан кейин норозилик намойиши бошланган. Беларусь Марказий сайлов комиссиясининг дастлабки ҳисоб-китобларига кўра, президентлик сайловларида республиканинг амалдаги раҳбари Александр Лукашенко 80,23 фоиз овоз тўплаган. Мухолифот номзоди Светлана Тихановская эса расмий маълумотларга кўра, 9,9 фоиз овоз олган.
Кейинроқ Светлана Тихановская ўтказилган сайловларда ўзини ғолиб дея ҳисоблашини маълум қилди ва Лукашенкога музокаралар ўтказиш таклифини берди.
