Xitoyga pandemiyaning kuchli to‘lqini qaytdi

🇨🇳 Ilk bor Xitoyda aniqlangan SOVID-19 kasalligi oradan uch yil o‘tib, yana ushbu davlatda shiddat bilan tarqala boshladi. Xususan, o‘tgan kuni hukumat rasmiylari mamlakatda kunlik xastalanish ko‘rsatkichlari pandemiya davridagi mutlaq rekord ko‘rsatkichga yetganini qayd etdi — 31,5 ming nafar bemor!

📊 Umuman, o‘tgan uch yil davomida bu yerda faqat aprel oyida xavotirli o‘sish dinamikasi kuzatilgandi. O‘shanda eng ko‘pi bilan kuniga 30 mingga yaqin kishiga COVID-19 tashxisi qo‘yilgan.

🚫 Shundan so‘ng Chin yurtida amalga oshirilgan qat’iy cheklovlarga asoslangan “nol holat” strategiyasi ma’lum muddat odamlarni bu xavfli kasallikdan himoyaladi. Ammo butun dunyo bo‘ylab keng tarqalayotgan pandemiyaning yangi to‘lqini oxir-oqibat qariyb 1,5 milliard aholiga ega Xitoyni ham chetlab o‘tmadi.

🦠 Hozir mamlakat rasmiylari karantin choralarini yanada kuchaytirish harakatida. Yirik shaharlarda qisman lokdaun va kasallikni aniqlashga qaratilgan ommaviy test sinovlari qayta tiklanyapti.

📈 Chunki 31 provinsiya ma’muriyati kasallik avj olganini ma’lum qilgan. Ular orasida 22 milliondan ortiq kishi yashaydigan poytaxt Pekin va 18,5 million aholi istiqomat qiladigan yirik megapolis Guanchjou shaharlari ham bor.

📌 Aslida, bir necha hafta avval bu yerda o‘rnatilgan maxsus cheklovlar biroz yumshatilgandi. Jumladan, bemorlar bilan yaqin aloqada bo‘lgan shaxslarni yetti kun davomida karantin markazida majburiy saqlash talabi besh kunga qisqartirildi.

❌ Biroq endi yana ehtiyotkorlik oshirilyapti. Pekinning yirik tumani — Chaoyangda aksariyat kompaniyalar eshigiga vaqtincha qulf osildi. Boshqa hududlardagi qator xizmat ko‘rsatish va ko‘ngilochar muassasalar faoliyati to‘xtatildi, odamlar masofiy ish tartibiga o‘tdi.

🗓 Guanchjou shahrida ham bugundan qisman karantin kuchga kiradi. Ushbu cheklovlar 6 million nafarga yaqin kishiga o‘z ta’sirini ko‘rsatishi aytilyapti.

‼️Umuman, hozir Xitoyda epidemiologik vaziyat murakkablashmoqda. Mamlakat rasmiylari bu yog‘iga koronavirusga qarshi emlash qamrovini yanada oshirishni maqsad qilgan.