Vengriya va Serbiya chegarasida muhojirlar otishma uyushtirgan

Serbiyaning Vengriya bilan chegarasi yaqinidagi Subotisa shahri chekkasida muhojirlar o‘rtasida sodir bo‘lgan otishma natijasida bir kishi halok bo‘ldi, yana yetti kishi jarohat olib kasalxonaga yotqizildi, deb xabar berdi shanba kuni Serbiyaning RTS telekanali.

Uning so‘zlariga ko‘ra, jarohatlanganlar orasida 16 yoshli qiz ham bor, uning hayoti xavf ostida.

Dastlabki ma’lumotlarga ko‘ra, otishma muhojirlarni noqonuniy olib o‘tish bilan kim shug‘ullanishi borasidagi kelishmovchilik tufayli yuzaga kelgan bo‘lishi mumkin.

Voqea sodir bo‘lgan joy to‘sib olindi, u yerga jandarmeriyaning kuchaytirilgan bo‘linmalari, shuningdek, ichki ishlar vaziri Aleksandr Vulin yetib keldi.

Subotisa meri Stevan Bakich mahalliy aholini ular xavf ostida emasligiga va shahar aholisi xavfsizligiga shubha qilmasligiga ishontirdi, deb yozadi RTS.