O‘zbekistonda 3-bosqich talabalarga ham maktabda dars o‘tishi mumkin
Hukumatning «Ta’lim darajasi yuqori bo‘lmagan maktablarga malakali o‘qituvchi-pedagoglarni jalb qilish chora-tadbirlari to‘g‘risida»gi qarorni qabul qildi, deb xabar beradi Vazirlar Mahkamasi huzuridagi Ta’lim sifatini nazorat qilish Davlat inspeksiyasi.
Qaroriga binoan, pedagogika yo‘nalishlarida kunduzgi, kechki va sirtqi bo‘limlarining 3-kursida tahsil olayotgan talabalarga maktablarda dars berish huquqi berildi (avvalgi tartibga binoan talabalar 4-kursdan boshlab maktablarda dars berishlari mumkin edi).
Ta’kidlanishicha, oliy ma’lumotli pedagog xodimlar va pedagogika yo‘nalishidagi oliy ta’lim muassasalarining bitiruvchilari to‘g‘ridan-to‘g‘ri ikkinchi malaka toifasiga ega bo‘ladi.
Shuningdek, qaror bilan boshqa hududlardan o‘qituvchi-pedagoglarni jalb etish tartibi belgilangan. Unga ko‘ra, ta’lim darajasi yuqori bo‘lmagan maktablarda dars berish istagini bildirgan o‘qiruvchi-pedagoglar har yili 1 iyuldan 1 avgustga qadar quyidagi ikki bosqichda saralab olinadi:
1-bosqichda ariza bilan ro‘yxatdan o‘tgan o‘qituvchilar tomonidan taqdim etilgan hujjatlar o‘rganib chiqiladi;
2-bosqichda ariza bilan ro‘yxatdan o‘tgan o‘qituvchilar kasbiy bilim va ko‘kinmalari, pedagogik mahorati hamda psixologik qobiliyati yo‘nalishida suhbatdan o‘tkaziladi.
Saralash onlayn tarzda amalga oshiriladi.