«O‘zbekiston ekologik texnologiyalar sanoat parki» tashkil etiladi

Prezident rahbarligida o‘tkazilgan yig‘ilishda qora metallurgiya sohasini rivojlantirishga qaratilgan yangi yirik loyihalar taqdim etildi.

Ma’lum qilinishicha, Bekobod metallurgiya kombinati hududidagi 90 gektar maydonda tayyor infratuzilmaga ega «O‘zbekiston ekologik texnologiyalar sanoat parki» tashkil etiladi.

Shuningdek, mazkur hududda qora metallurgiya sohasi bo‘yicha R&D (ilmiy-tadqiqot va ishlanmalar) markazi tashkil qilinib, yangi turdagi mahsulotlarni yaratish va ularni sanoatga joriy etish yo‘lga qo‘yiladi.

Sanoat parkida xalqaro standartlar bo‘yicha sertifikatlar beradigan zamonaviy laboratoriya ham ish boshlaydi.

Joriy yilning o‘zidayoq xususiy investorlar ishtirokida katta diametrli quvurlar, ko‘tarma kranlar, filtrlash uskunalari va boshqa yuqori qo‘shilgan qiymatga ega mahsulotlarni ishlab chiqarish bo‘yicha loyihalarni amalga oshirish rejalashtirilgan.

Bundan tashqari, Samarqand, Jizzax, Namangan va Sirdaryo viloyatlaridagi yirik metallurgiya korxonalari atrofida umumiy qiymati 100 million dollarlik kooperasiya loyihalari dasturi ishlab chiqiladi.

Qayd etilishicha, mazkur tashabbuslar hududlarda qo‘shilgan qiymat zanjirini kengaytirish, xususiy sektor faolligini oshirish hamda yangi turdagi metall mahsulotlarini mahalliylashtirishga xizmat qiladi.