Ukraina hukumati iste’foga chiqdi

Ukraina Oliy radasi Bosh vazir Yuliya Sviridenkoning iste’fosini ma’qulladi. U bilan birga Hukumatning butun tarkibi ham avtomatik ravishda o‘z vakolatlarini tugatdi, deb xabar beradi Ukrinform.

Tegishli qarorni 258 nafar deputat qo‘llab-quvvatlab ovoz berdi.

Ovoz berishdan oldin parlamentda so‘zga chiqqan Yuliya Sviridenko deputatlar va davlat organlariga hamkorlik uchun, Ukraina Prezidentiga bildirilgan ishonch uchun, shuningdek, mamlakat fuqarolariga qo‘llab-quvvatlashi va mehnati uchun minnatdorlik bildirdi.

Uning ta’kidlashicha, Hukumat faoliyatining asosiy yo‘nalishlari aholini qo‘llab-quvvatlash, energetika, ta’lim, transport, sog‘liqni saqlash va uy-joy-kommunal xo‘jaligi tizimlarining barqaror ishlashini ta’minlash, shuningdek, mamlakat ichida ko‘chirilgan fuqarolarga yordam ko‘rsatishdan iborat bo‘lgan.

Bosh vazir bilan birga Bosh vazirning birinchi o‘rinbosari — Energetika vaziri Denis Shmigal, vise-premyerlar va vazirlar ham o‘z vakolatlarini tugatdi.

Oliy rada raisi Ruslan Stefanchuk Yuliya Sviridenkoga amalga oshirgan ishlari uchun minnatdorlik bildirib, so‘nggi bir yil davomida parlament va Hukumat o‘rtasidagi hamkorlikni yuqori baholadi.

Ukrinform agentligi ma’lumotiga ko‘ra, yangi Hukumat tarkibini tayinlash masalasi 16 iyulda ko‘rib chiqiladi. Shu vaqtga qadar Vazirlar Mahkamasi rahbari vazifasini Denis Shmigal vaqtincha bajaradi.

Yuliya Sviridenko Ukraina Bosh vaziri lavozimiga 2025 yil 17 iyulda tayinlangan edi.