Ukraina harbiylari Wildberries logistika markazlariga yangi hujum uyushtirdi

​Ukraina harbiylari 22 iyulga o‘tar kechasi Krasnodar va Nevinnomisskdagi Wildberries logistika markazlariga hujum qildi, deb xabar berdi marketpleys rahbari Tatyana Kim. "Afsusdamanki, jabrlanganlar bor", — deb yozdi u Telegram ijtimoiy tarmog‘ida. Kompaniya har ikkala markaz faoliyati to‘xtatilganini ma’lum qildi.

​Nevinnomisskda ombor majmuasi yonib ketgan, besh kishi jabrlangani ma’lum, deb xabar berdi Stavropol o‘lkasi gubernatori Vladimir Vladimirov. Hokimiyat ma’lumotlariga ko‘ra, Krasnodardagi ombor majmuasida 10 kishi jabrlangan.

​"Uch kishi og‘ir ahvolda, bir kishi o‘rtacha og‘irlikda. Omborda kechki hujum oqibatlarini bartaraf etish va yong‘inni o‘chirish ishlari davom etmoqda", — dedi Krasnodar gubernatori Veniamin Kondratyev.

​Krasnodar o‘lkasining Armavir shahrida dronlar neft bazasiga hujum qilgan, kuchli yong‘in boshlangan, deb xabar berdi shahar ma’muriyati.

Gubernator bir nafar xodim halok bo‘lganini ma’lum qildi.
​Ukraina Wildberries logistika markazlariga qilingan yangi hujum bo‘yicha hozircha izoh bergani yo‘q.

​Rossiya Mudofaa vazirligi ertalab soat 20:00 dan 8:00 gacha mamlakatning 16 ta hududida, jumladan Krasnodar va Stavropol o‘lkalari, anneksiya qilingan Qrim, shuningdek Qora va Azov dengizlari ustida 242 ta Ukraina droni "tutib olingani va yo‘q qilinganini" e’lon qildi.

​Krasnodardagi ombor majmuasidagi yong‘inni o‘chirishga vertolyot jalb etiladi, deb xabar berdi hududiy tezkor shtab. Nevinnomisskda favqulodda holat rejimi e’lon qilindi.