Texnikum bitiruvchilari uchun 2-kursdan o‘qishga qabul boshlandi

Oliy ta’lim tashkilotlari ma’lumotiga ko‘ra, arizalar 25 iyulga qadar (shu kuni ham) my.edu.uz platformasi orqali onlayn tarzda qabul qilinadi.

Ro‘yxatdan o‘tish jarayonida abituriyentlardan texnikum diplomining asl nusxasi talab etilmaydi. Faqat shaxsni tasdiqlovchi ma’lumotlarni kiritishning o‘zi kifoya bo‘lib, qolgan zarur ma’lumotlar axborot tizimi tomonidan avtomatik shakllantiriladi.

Mazkur tartib texnikumni muvaffaqiyatli tamomlagan bitiruvchilarga tatbiq etiladi. Ya’ni, o‘qish davomida barcha semestrlar bo‘yicha baholari asosan 4 («yaxshi») va 5 («a’lo») bo‘lgan, shu bilan birga baholarining kamida 50 foizi «a’lo»ni tashkil etgan bitiruvchilar (tibbiyot yo‘nalishlarida esa kamida 85 foizi) ushbu imkoniyatdan foydalanishi mumkin.

Suhbat natijalariga ko‘ra, oliy ta’lim tashkiloti komissiyasi tomonidan qo‘yilgan ballarning o‘rtacha ko‘rsatkichi 67 ball va undan yuqori bo‘lsa, abituriyent suhbatdan o‘tgan hisoblanadi hamda to‘lov-kontrakt asosida bakalavriatning 2-bosqichiga talabalikka tavsiya etiladi.

Ushbu qabul tartibi oliy harbiy va oliy harbiylashtirilgan ta’lim muassasalari, Toshkent davlat yuridik universiteti, shuningdek, O‘zbekistonda faoliyat yuritayotgan xorijiy va nodavlat oliy ta’lim tashkilotlari hamda ularning filiallariga nisbatan tatbiq etilmaydi.

Texnikum bitiruvchilari o‘z mutaxassisligiga mos bakalavriat ta’lim yo‘nalishlari bo‘yicha oliy ta’lim muassasalarining 2-bosqichidan o‘qishni davom ettirish imkoniyatiga ega.