Suriyaning sobiq prezidenti Bashar Asad oilasi bilan birga “Moskva Siti”dagi osmono‘par binolardan birida yashamoqda — Die Zeit

Nemis nashrining Asadlar oilasiga yaqin manbasiga tayanib xabar berishicha, Suriyaning sobiq prezidenti o‘z oilasi bilan birga “Moskva Siti” hududidagi 300 metrlik osmono‘par binolardan birida istiqomat qilmoqda va vaqtining ko‘p qismini onlayn videoo‘yinlarga sarflamoqda. Bashar Asad ayrim vaqtlarda kvartirasi joylashgan osmono‘par binoning birinchi qavatidagi savdo markazida ko‘rinish beradi.

Ma’lumotlarga ko‘ra, Asadlar oilasi “Moskva-Siti”da 20 ga yaqin hashamatli kvartiralarga egalik qiladi. Shunga qaramay, ular ayrim cheklovlar doirasida yashashga majbur. Jumladan, ularga siyosiy faoliyat bilan shug‘ullanish yoki ommaviy chiqishlar qilish taqiqlangan.

"Agar Asadlar bu shartlarga rioya qilsa, Rossiyada xavfsizlikda bo‘lishadi hamda ularni ekstradisiya qilish masalasi ko‘tarilmaydi. Bashar Asad va uning oilasi xavfsizligini xususiy qo‘riqlash xizmati ta’minlaydi", — deya ma’lum qildi Die Zeit suhbatdoshi.

Nashr manbasining qo‘shimcha qilishicha, hozir Rossiya hududida taxminan 1,2 ming nafar suriyalik sobiq ofiser va amaldorlar yashamoqda.