Superliga. 17-turning so‘nggi o‘yinida "Nasaf" va "Paxtakor" to‘qnashadi

O‘zbekiston Superligasida bugun, 16 avgust kuni 17-tur uchrashuvlari yakunlanadi. Turning so‘nggi va markaziy bahsi Qarshida o‘tkazilib, "Nasaf" o‘z maydonida "Paxtakor"ni qabul qiladi. Uchrashuv soat 19:00 da boshlanadi.

Mazkur jamoalar joriy mavsumda bir bor to‘qnashgan. 28 aprel kuni Toshkentda o‘tgan uchrashuvda g‘olib aniqlanmagan — 2:2. O‘shanda "Nasaf" uchrashuv so‘nggida 10 kishi bo‘lib qolganiga qaramay, 90+3-daqiqada hisobni tenglashtirgandi.

"Nasaf" so‘nggi turda "Qo‘qon-1912" bilan 0:0 hisobida durang o‘ynadi. "Paxtakor" esa "Buxoro"ga qarshi bahsda 2:2 hisobini qayd etdi. Toshkentliklar 11 avgust kuni Osiyo Chempionlar ligasi doirasida "Al-Hussayn"ni 3:0 hisobida mag‘lub etgan.

Qarshidagi uchrashuvni Asker Najafaliyev boshqarib boradi. Unga qanotlarda Baxtiyorxo‘ja Shavkatov va Ruslan Serazitdinov yordam beradi. Abdurashid Xudoyberganov VAR hakami sifatida ishlaydi.

17-turda hozirga qadar "Neftchi" "Andijon"ni 3:0, "So‘g‘diyona" "Surxon"ni 3:1, "Buxoro" OKMKni 2:0 hisobida mag‘lub etdi. Shuningdek, "Navbahor" — "Bunyodkor" bahsi 4:3, "Dinamo" — "Xorazm" uchrashuvi 2:2 hisobida yakunlandi, "Qizilqum" "Mash’al"dan 2:0, "Qo‘qon-1912" esa "Lokomotiv"dan 2:1 hisobida ustun keldi.