Rus askarlari Tergov qo‘mitasidan noqonuniy ozodlikdan mahrum qilish bo‘yicha jinoiy ish qo‘zg‘atishni talab qilishmoqda
Ukrainada jang qilishdan bosh tortgani uchun ikki hafta yerto‘lada saqlangan rossiyalik harbiylar Tergov qo‘mitasidan noqonuniy qamoqqa olish, odam o‘g‘irlash va mansab vakolatlarini suiiste’mol qilish moddalari bo‘yicha jinoiy ish qo‘zg‘atishni talab qildi. Bu haqda "Agora" inson huquqlari tashkiloti rahbari Pavel Chikov xabar berdi.
Avgust oyida LXRda jang qilish uchun jo‘natilgan moskvalik Aleksandr Afonin va pskovlik Andrey Vasilyev tergov organlariga ariza bilan murojaat qilishdi. Huquq himoyachisining yozishicha, harbiylarga u yerda yetarli darajada tibbiy va moddiy yordam ko‘rsatilmagan va jangovar harakatlarda qatnashishdan bosh tortishga qaror qilgan.
Natijada, ular yana 280 ga yaqin safarbar qilingan ruslar bilan birga Zaysevo qishlog‘idagi yerto‘laga joylashtirilgan. Harbiylarning so‘zlariga ko‘ra, ular u yerda ikki hafta davomida g‘ayriinsoniy sharoitda yetarli oziq-ovqatsiz ushlab turilgan. Bundan tashqari, yuqori martabali qo‘mondonlar ularga tahdid qilib, psixologik bosim o‘tkazgan.
Shartnoma muddati tugagach, harbiy xizmatchilar Rostov viloyatiga olib ketilgan. Ular bilan birgalikda Zaysevodagi yerto‘lada saqlanayotgan uch nafar safarbar qilingan shaxsning qarindoshlari Tergov qo‘mitasiga murojaat qilishgan.
Chikovning yozishicha, yana bir shunga o‘xshash voqea DXRning Zavitne Bajanna qishlog‘ida sodir bo‘lgan, u yerda Primoryedan safarbar qilingan fuqaro Mixail Nosov yerto‘lada saqlangan. U bilan birga yerto‘lada yana 17 nafar harbiy xizmatchi bo‘lgan, ular ham jang qilishdan bosh tortgan. Taxminan ikki hafta o‘tgach, Nosov Rostov viloyatiga yuborilgan. Uning so‘zlariga ko‘ra, Rostovga yuborilgach kasalxonaga yotqizilmagan. U ham Tergov qo‘mitasiga o‘ziga qarshi sodir etilgan jinoyatlar haqida ariza topshirgan.
