Rasman! Vinisius «Real» bilan shartnomasini uzaytirdi

Braziliyalik hujumchi Vinisius Junior Madridning «Real» klubi bilan yangi shartnoma imzoladi. Yangi kelishuv 2032 yilning yoziga qadar amal qiladi.

«Vinisius Junior 2018 yilning iyul oyida 18 yoshida «Real» safiga qo‘shilgan. Klubdagi sakkiz mavsumi davomida u 375 ta uchrashuvda maydonga tushib, 128 ta gol urdi va 14 ta sovrinni qo‘lga kiritdi: ikki marta Chempionlar ligasi, uch marta Klublar o‘rtasidagi jahon chempionati, ikki marta UYEFA Superkubogi, uch marta Ispaniya chempionligi, bir marta Ispaniya Kubogi va uch marta Ispaniya Superkubogida g‘olib chiqdi.

Ushbu sovrinlarning barchasini qo‘lga kiritishda uning o‘yini, golli uzatmalari va hal qiluvchi gollari muhim ahamiyat kasb etdi. Jumladan, u Chempionlar ligasining so‘nggi ikki finalida ham gol urishga muvaffaq bo‘lgan.

Vinisius Junior klub tarixidagi eng muvaffaqiyatli davrlardan birida jamoaning eng muhim futbolchilaridan biriga aylandi», — deyiladi «Real» rasmiy saytida.

Vinisius 2018 yilning yozidan buyon «Real» sharafini himoya qilib kelmoqda. U Madrid klubiga Braziliyaning «Flamengo» jamoasidan 45 million yevro evaziga ko‘chib o‘tgan.

O‘tgan mavsumda hujumchi «Real» safida 53 ta uchrashuvda ishtirok etib, 22 ta gol urdi va 14 ta golli uzatmani amalga oshirdi.