Poraxo‘rlik qilgan Xitoy Markaziy banki raisi o‘rinbosariga o‘lim jazosi tayinlandi

U 55 million AQSh dollari miqdorida mablag‘ni talon taroj qilgan.

Xitoyning Xuangan shahrining o‘rta bosqich sudi mamlakat Markaziy banki rahbarining sobiq o‘rinbosari Fan Ifeyga 386 million yuanning (hozirgi kurs bo‘yicha taxminan $55 million) miqdorida pora olish jinoyati uchun o‘lim jazosini tayinladi. Hukm ikki yilga kechiktirish sharti bilan chiqarilgan. Bu haqda "Jenmin Jibao" gazetasi xabar berdi.

Nashrning aniqlashicha, sudlanuvchi umrbod barcha siyosiy huquqlardan mahrum qilingan. Fan Ifeyning barcha shaxsiy mulki musodara qilinadi va agar ikki yil o‘tgandan keyin qatl hukmi umrbod qamoqqa o‘zgartirilsa, jazoni yengillashtirish yoki muddatidan oldin ozod qilish imkonsiz bo‘ladi.

Sud Fan Ifeyni "jiddiy holatlar bilan bog‘liq jinoyat sodir etgan va og‘ir ijtimoiy oqibatlarga olib kelgan" deb aybladi. Xususan, sobiq bankir xalq manfaatlariga "ayniqsa katta zarar yetkazdi".

Gazetaning ma’lumotlariga ko‘ra, sudlanuvchi aybini tan olgan va qilgan ishlariga pushaymon bo‘lgan, shuningdek, "talon-taroj qilingan mablag‘larni faol qaytarib bergan".

Ma’lumot uchun, 2012 yilda Si Szinpin boshchiligidagi "beshinchi avlod" rahbarlarining hokimiyatga kelishidan so‘ng Xitoy hukumati korrupsiyaga qarshi kurashni kuchaytirdi.
So‘nggi yillarda keng qamrovli antikorrupsiya kampaniyasi natijasida ko‘plab mansabdorlar, shu jumladan yuqori lavozimdagilar ham ishdan olinib, turli muddatli qamoq jazolariga, jumladan umrbod qamoq jazosiga hukm qilindilar.