Oq uy bayonot berdi
Oq uyning Polshada qulagan raketa hodisasi bo‘yicha to‘liq bayonoti e’lon qilindi.
"Biz Polsha hukumatining Ukraina chegarasi yaqinidagi portlash bo‘yicha tergovlariga to‘liq ishonamiz, ularni professional va puxta yondashayotgani uchun hurmat qilamiz. Polshalik hamkasblarimiz bilan yaqin aloqada bo‘lib turibmiz, chunki bizda hali ham ma’lumot to‘planmoqda.
Biz prezident Dudaning portlash Ukraina havo hujumidan mudofaa tizimlari ishlagani natijasida sodir bo‘lgan degan dastlabki taxminiga zid bo‘lgan hech narsani ko‘rmadik. Har qanday yangi ma’lumotni mavjud bo‘lganda baholashda va ulashishda davom etamiz. Shuningdek, ukrainaliklar bilan yaqin aloqani davom ettiramiz.
Biroq, yakuniy xulosalar qanday bo‘lishidan qat’i nazar, bu fojiali voqea uchun pirovard natijada Rossiya javobgar, Rossiya fuqarolik infratuzilmasiga zarba berish uchun maxsus mo‘ljallangan raketalar bilan Ukrainaga zarbalar bergani aniq. Ukraina o‘zini himoya qilish huquqiga ega edi va bu huquq hozir ham mavjud.
Biz yana bir bor Ukraina xalqi bilan birdamligimizni va bu og‘ir aviazarbalar natijasida ko‘rgan yo‘qotishlar uchun hamdardligimizni bildiramiz. Oqibatda yana millionlab ukrainaliklar elektr energiyasi, suv va asosiy ehtiyoj vositalarisiz qolganidan xabardormiz. Bizning fikrlarimiz va duolarimiz yana bir bor fojiali tarzda halok bo‘lgan Polsha fuqarolarining oilalariga yo‘naltiriladi".
