Navoiydagi konda “BelAZ” bosib qolishidan avtomobildagi ikki kishi halok bo‘ldi

❗️Ijtimoiy tarmoqlarda «Muruntov» koni hududida yo‘l-transport hodisasi sodir bo‘lgani haqida xabarlar tarqaldi.

Joriy yilning 21 iyul kuni soat 05:30 larda mazkur kon hududida avtotransport vositasi va xizmat avtomashinasi ishtirokida yo‘l-transport hodisasi sodir bo‘lgan. Hodisa oqibatida 2 nafar ishchi-xodim vafot etgan.

Mazkur holat yuzasidan huquqni muhofaza qiluvchi organlar tomonidan tergovga qadar tekshiruv ishlari olib borilmoqda. Shuningdek, nazorat qiluvchi davlat tashkilotlari tomonidan maxsus tekshiruv o‘tkazilib, yo‘l-transport hodisasining sodir bo‘lish holatlari hamda kelib chiqish sabablari o‘rganilmoqda.

Kombinatning mas’ul xizmatlari tomonidan bunday noxush hodisalarning oldini olish, mehnat va harakat xavfsizligini yanada ta’minlash maqsadida qo‘shimcha chora-tadbirlar ko‘rilmoqda.

Vafot etganlarning oila a’zolari va yaqinlariga chuqur hamdardlik bildiramiz.