Millatlar ligasi. Ispaniya terma jamoasi Chexiyani mag‘lub etdi, Yamal gol urdi (videosharh)

Evropa millatlar ligasi «A» divizioni 3-guruhida 3-tur uchrashuvi bo‘lib o‘tdi. Unda Ispaniya terma jamoasi Chexiyani 3:1 hisobida mag‘lub etdi.

Uchrashuvning 6-daqiqasida Ispaniya terma jamoasi vingeri Lamin Yamal hisobni ochdi. 35-daqiqada yarim himoyachi Rodri ispanlarning ustunligini ikki to‘pga yetkazdi.

Chexiya 69-daqiqada Irji Slamaning goli evaziga farqni qisqartirdi. Biroq 85-daqiqada Chexiya kapitani Ladislav Kreychi ikkinchi sariq kartochkasini olib, maydondan chetlatildi.

Ispaniyaliklar son jihatidan ustunlikdan unumli foydalanib, 89-daqiqada Mikel Merinoning goli bilan yakuniy hisobni o‘rnatdi — 3:1.

Shu tariqa, Ispaniya 3 ta uchrashuvdan so‘ng 9 ochko jamg‘arib, 3-guruh peshqadami bo‘lib turibdi. Chexiya esa ochko jamg‘ara olmagan holda 4-o‘rinda bormoqda.

Millatlar ligasi, «A» divizioni, 3-guruh, 3-tur
3 oktyabr, Ovyedo, «Nuevo Karlos Tartyere»
Ispaniya — Chexiya 3:1
Gollar: Yamal, 6; Rodri, 35; Merino, 89 — Slama, 69.
Chetlatish: Kreychi, 85.