Meksika AQSh bilan chegarani yopish niyatimi?

AQShning saylangan prezidenti Donald Tramp Meksikadan import qilinadigan barcha mahsulotlarga 25 foizlik boj joriy etilishini e’lon qilganidan ikki kun o‘tib Meksika prezidenti Klaudiya Sheynbaum bilan telefon orqali muloqot qildi, deya xabar beradi Kazinform muxbiri ABC Newsga tayanib.

Donald Tramp o‘zining «Truth Social» sahifasida suhbatni “ajoyib” va “juda samarali” deb atadi va ikki yetakchi chegara nazorati va narkotiklar oqimiga qarshi kurashish yo‘llarini muhokama qilganini aytdi.

Trampning so‘zlariga ko‘ra, Meksika prezidenti “Meksika orqali AQShga migrasiyani to‘xtatishga rozi bo‘lib, janubiy chegarani amalda yopdi”.

O‘z navbatida, Meksika rahbari chegarani yopishni rejalashtirmaganligini ta’kidladi.

— Men prezident Donald Tramp bilan juda yaxshi suhbatlashdim. Suhbatimizda men unga Meksikaning inson huquqlarini hurmat qilgan holda migrasiya muammosini hal qilish uchun olib borayotgan keng qamrovli strategiyasini tushuntirdim. Bu muhojirlarga chegaraga yetib borishdan oldin yordam berishni ta’minlaydi. Biz takror aytamizki, Meksikaning pozisiyasi chegaralarni yopish emas, balki hukumatlar va xalqlar o‘rtasida ko‘prik o‘rnatishdir, — dedi Klaudiya Sheynbaum.

Klaudiya Sheynbaum X-da "bizning suverenitetimiz doirasida xavfsizlik masalalari bo‘yicha hamkorlikni kuchaytirish va fentanil iste’molini oldini olish uchun mamlakatda olib borayotgan kampaniyamizni muhokama qilishdi" deb yozgan.

Qo‘ng‘iroq Donald Tramp shu haftada AQShga noqonuniy migrasiya va giyohvand moddalar oqimini to‘xtatish maqsadida Meksika, shuningdek, Kanada va Xitoyga tariflar joriy etish rejasini e’lon qilganidan keyin qilingan.

Avvalroq Trampning Meksikaga kiritgan bojlari va AQShda sabzavot va mevalar narxining oshishi mumkinligidan qaysi kompaniyalar zarar ko‘rishi haqida xabar bergan edik.