Koronavirusdan sog‘ayganlar virusni boshqalarga yuqtirishi mumkinmi?

Yel universiteti tadqiqotchilari odamlar COVID-19 alomatlari yo‘qolgandan so‘ng yana sakkiz kun davomida infeksiyaning tashuvchisi bo‘lishi mumkinligini aniqladilar. Tadqiqot haqida maqola Amerikaning Nafas olish va reanimasiya tibbiyot jurnalida chop etildi. Bu haqda "qalampir.uz" yozmoqda.

Ta’kidlanishicha, olimlar Pekin markaziy shifoxonasida 2020 yil 28 yanvardan 9 fevralgacha davolangan 16 nafar bemorni tekshirib ko‘rishdi. Tadqiqotchilar turli xil kunlarda barcha bemorlarning tomoq shilliq qatlamidan olingan suyuqlik namunalarini to‘plashdi. Natijada bemorlarning 50 foizi kasallik belgilari yo‘qolgandan keyin ham sakkiz kun davomida virusni tarqatishi mumkinligi ma’lum bo‘ldi.

Tadqiqotchilarning ma’lum qilishicha, barcha bemorlar o‘rta yoshli va COVID-19'ni yengil shaklda o‘tkazilgan. Shuning uchun keksa yoshdagi bemorlarda yoki kasallikning og‘ir shaklini o‘tkazganlarda ushbu holat kuzatilishi aniq emas.

Olimlar koronavirusdan tuzalib shifoxonadan chiqqan odamlarga o‘zini 14 kun davomida izolasiya qilishini tavsiya qildilar. Ularning yaqinlariga esa ma’lum muddatni o‘tkazgandan so‘nggina sobiq bemor bilan muloqot qilish kerakligini ta’kidlashdi.

So‘nggi ma’lumotlarga ko‘ra, dunyo bo‘yicha koronavirus bilan kasallanganlar 1 140 327 nafarni tashkil qilmoqda. Ularning 60 887 nafari vafot etgan, 233 930 nafari esa sog‘aygan.