Gaiti prezidentini o‘ldirishda 26 kolumbiyalik va 2 amerikalik ishtirok etgan
Gaiti polisiyasi prezident Jovenel Moisening o‘ldirilishida 28 nafar yollanma askarlardan iborat guruh, jumladan 26 nafar Kolumbiya fuqarosi va 2 nafar amerikalik ishtirok etganini aytdi, deb yozadi BBC.
Polisiya rahbari Leon Charlzning so‘zlariga ko‘ra, 8 gumonlanuvchini qidirish hanuzgacha davom etmoqda, guruhning qolgan qismi o‘ldirilgan yoki hibsga olingan.
Charlzning so‘nggi ma’lumotlariga ko‘ra, 15 kolumbiyalik va 2 amerikalik hibsga olingan, 3 hujumchi o‘ldirilgan.
Chorshanba kuni rasmiylar gumondorlar yashiringan uyni poytaxt Port-o-Prensda jinoyat sodir bo‘lgan joy yaqinidan topdilar. Ular bilan otishma kechgacha davom etdi va payshanba kuni polisiya hujumchilarning aksariyatini qo‘lga olishga muvaffaq bo‘ldi.
Shu bilan birga, gumonlanuvchilardan 11 nafari Tayvan elchixonasi binosida hibsga olingan. Xabarlarga ko‘ra, qo‘riqchilar Moizning o‘ldirilishi ortidan xavfsizlik nuqtai nazaridan yopilgan missiya binosiga bir guruh qurollangan odamlar kirib kelishgan. Shundan so‘ng, elchixona xodimlari bosqinchilarni hibsga olish uchun polisiyaga binoga kirishga ruxsat berishdi.
Charlz matbuot anjumani o‘tkazdi va hibsga olinganlarni olib keldi: ular qo‘llarida kishan bilan o‘tirgan jurnalistlarga ko‘rsatildi, ularning qo‘llari orqasida kishanlangan edi. Shuningdek, rasmiylar ulardan tortib olingan qurollarni, Kolumbiya pasportlarini, radiostansiyalarni va turli xil asboblarni, shu qatorda armaturani kesish uchun bolg‘a va qaychini namoyish etishdi.
"Chet elliklar mamlakatimizga prezidentni o‘ldirish uchun kelishdi", dedi polisiya rahbari.
Kolumbiya mudofaa vaziri Diyego Molano, dastlabki ma’lumotlarga ko‘ra, hujumda Kolumbiya armiyasining sobiq a’zolari ishtirok etganini aytdi. U qotillikni tergov qilishda Bogota yordam berishiga va’da berdi.
Vashington hujum qilganlar orasida AQSh fuqarolari bo‘lganligi haqidagi ma’lumotni hali tasdiqlamadi. Ayni paytda Gaitida polisiya jinoyatga buyurtma berganlarni qidirmoqda va Amerika rasmiylaridan tergovda yordam berishni so‘radi.
7 iyulga o‘tar kechasi noma’lum shaxslar Gaiti prezidenti Jovenel Moise qarorgohiga bostirib kirib, uni otib o‘ldirishdi, shu bilan birga uning xotiniga jiddiy jarohat yetkazishdi.
