Eron vaziri Isroil bayrog‘i tufayli Avstriyaga borishdan bosh tortdi
Eron tashqi ishlar vaziri Muhammad Javad Zarif Avstriyaning tashqi ishlar vazirligiga Isroil bayrog‘i osilganligi sababli Venaga tashrif buyurishdan bosh tortdi. Bu haqda Avstriyaning ORF.at teleradiokompaniyasi Avstriya tashqi ishlar vazirligiga asoslanib xabar berdi.
Vazirlik ma’lumotlariga ko‘ra, Zarif Venaga 15 may, shanba kuni Avstriya tashqi ishlar vaziri Aleksandr Shallenberg bilan muzokara o‘tkazish uchun kelishni rejalashtirgan.
"Biz afsusdamiz va buni e’tiborga olamiz", dedi Avstriya tashqi ishlar vazirligi.
Avstriya tashqi ishlar vazirligi tvitterda vazirlik binosiga Isroil bayrog‘i osilgani aks etgan suratni joylashtirdi. Suratga Isroil bilan birdamlik haqidagi tvit ham qo‘shildi.
«Biz isroillik sheriklarimiz bilan birdammiz. Shuning uchun bugun biz bayroqni Venadagi Tashqi ishlar vazirligi binosiga ko‘tardik. Isroil xavfsizligini qo‘llab-quvvatlashimiz beqiyos», - deyilgandi tvitda.
Bunga javoban Eron tashqi ishlar vazirining o‘rinbosari Abbos Aragchi Venaning pozisiyasidan noroziligini bildirdi va Falastinni qo‘llab-quvvatlashini ta’kidladi.
“Bir necha kun ichida Venadagi hukumat idoralari ustida o‘nlab begunoh tinch aholini, shu jumladan ko‘plab bolalarni shafqatsizlarcha o‘ldirgan bosqinchi rejim bayrog‘ini ko‘rish hayratlanarli va alamli. Biz Falastin bilan birgamiz", deb yozdi u.