Eron Tashqi ishlar vazirligi: Tehron Yevropa bilan yadroviy muzokaralar haqida o‘ylamayapti

Eron BMT sanksiyalarini qayta joriy etishga yordam bergan Yevropa bilan yadroviy muzokaralar haqida o‘ylamayapti, ammo AQSh bilan “adolatli va muvozanatli” muzokara jarayonini qayta boshlashga tayyor.

Bu haqda Eron tashqi ishlar vaziri Abbos Aragchӣ davlat televideniyesi orqali jonli efirda chiqish qilib, mamlakat tashqi siyosatining dolzarb masalalari haqida fikr bildirdi.

Diplomat ta’kidlashicha, 9 sentyabr kuni Qohirada Eron va Atom energiyasi bo‘yicha xalqaro agentlik (MAGATE) o‘rtasida imzolangan, o‘zaro hamkorlikni tiklashni ko‘zda tutuvchi kelishuv BMT sanksiyalari kuchga kirganidan so‘ng o‘z kuchini yo‘qotgan.

Biroq, Aragchining so‘zlariga ko‘ra, bu hamkorlikning to‘liq to‘xtatilganini anglatmaydi:

“Qohira kelishuvi hozircha to‘xtatib qo‘yilgan. Biz agentlik bilan hamkorlikni butunlay to‘xtatamiz demayapmiz, chunki hamkorlikning ayrim yo‘nalishlari bizning manfaatlarimizga mos keladi. Aloqalar uzilmaydi, ammo kelishuvni amalga oshirish hozircha qoldirildi. Agentlikning yangi talablari bo‘yicha qarorni Oliy milliy xavfsizlik kengashi qabul qiladi”, — dedi vazir.

Aragchining ta’kidlashicha, Tehron Yevropa davlatlari bilan yadroviy muzokaralar olib borish uchun hech qanday asos ko‘rmayapti, chunki bu muzokaralar BMT sanksiyalarining qayta joriy etilishiga sabab bo‘lishi mumkin:

“Hozirda biz yevropaliklar bilan muzokaralar uchun asos ko‘rmayapmiz. Biz AQSh bilan adolatli va muvozanatli muloqotga tayyormiz”, — dedi u.

Vazir qo‘shimcha qildi, AQSh bilan vositachilar orqali aloqalar hanuz davom etmoqda:

“Bizning AQShga nisbatan pozisiyamiz har doim aniq bo‘lgan — agar ular shart qo‘yishga urinmasdan, o‘zaro hurmat va teng huquqlilik asosida muzokara qilishga tayyor bo‘lsalar, biz ham shunday muzokaralarga tayyormiz”, — dedi diplomat.

Aragchӣ, shuningdek, AQSh prezidenti Donald Trampning Eron Ibrohim kelishuvlariga qo‘shilishi mumkinligi haqidagi bayonotiga ham javob berdi:

“Ibrohim kelishuvlari, muqaddas nomiga qaramay, Falastin xalqi huquqlarini inkor etadigan, bosqinchi va jinoyatchi rejimni qonuniy deb tan olishga qaratilgan xiyonatkor rejadir. Bu kelishuvlar bizning g‘oyalarimiz bilan hech qanday umumiylikka ega emas”, — dedi vazir.

Shuningdek, u Rossiya rasmiylarining ma’lumotlariga tayanib, o‘tgan hafta Rossiya prezidenti Vladimir Putin va Isroil bosh vaziri Binyamin Netanyahu o‘rtasida bo‘lib o‘tgan telefon suhbati haqida ham to‘xtalib o‘tdi:

“Rossiyalik do‘stlarimiz ma’lum qilishicha, Netanyahu Eron bilan yangi mojaro boshlash niyatida emasligini aytgan. Ammo bu biz uchun muhim signal emas — Eron qurolli kuchlari to‘liq shay holatda, sionit rejimining aldash ehtimoli yuqori, va bunday bayonotlar ko‘pincha chalg‘itish uchun qilinadi”, — deya ta’kidladi Aragchӣ.