Emmanuel Makron arman tilida Armanistonni qo‘llab-quvvatladi
Fransiya prezidenti Emmanuel Makron "Facebook"da arman tilidagi yozuvini joylashtirdi. U Syunikdagi vaziyat bilan bog‘liq ravishda arman xalqini qo‘llab-quvvatlashini bildirdi.
"Ozarbayjon qurolli kuchlari Armaniston hududiga bostirib kirdi. Ular zudlik bilan olib tashlanishi kerak", deb yozgan Fransiya rahbari.
13 may oqshomida Makron Armaniston Bosh vaziri vazifasini bajaruvchi Nikol Pashinyan bilan telefon orqali suhbatlashdi. Ular Ozarbayjon qurolli kuchlari kirib kelgan Syunik mintaqasidagi vaziyatni muhokama qildilar.
14 may kuni Armaniston-Ozarbayjon chegarasidagi vaziyat Rossiya va Ozarbayjon xavfsizlik kengashlari kotiblari tomonidan muhokama qilindi. Ayni paytda Rossiya prezidenti Vladimir Putin Pashinyan bilan suhbatlashib, vositachilik yordamini taklif qilgan.
Avvalroq Armaniston mudofaa vazirligi Ozarbayjon qo‘shinlarining Armanistonning Syunik viloyatiga kirib borishi to‘g‘risida xabar berdi. Vazirlikning aniqlik kiritishicha, 12 may kuni Ozarbayjon Qurolli Kuchlari chegaralarni aniqlashtirish bahonasida chegara hududida muayyan harakatlarni amalga oshirishga urinishgan.
Armaniston qo‘shinlari bo‘linmalari tegishli choralarni ko‘rdilar va shundan so‘ng Ozarbayjon harbiylari ishni to‘xtatdilar. Vaziyatni hal qilish bo‘yicha muzokaralar olib borilmoqda.