Britaniyada elektr bilan bog‘liq muammolar bu qishda boshlanishi mumkin

Britaniya bu qishda yoritishni davom ettirish uchun ko‘proq import qilinadigan energiya manbalariga tayanadi.

Buyuk Britaniyada joriy qishda Rossiyadan energiya yetkazib berish kamaygan taqdirda elektr energiyasi bilan bog‘liq tarang davrlar bo‘lishi mumkin. Bu haqda “Telegraph” gazetasi Britaniyaning National Grid energetika tizimining operatoriga tayanib yozgan.

“Yillik qishki elektr energiyasi prognozida National Grid bu qishda qit’adan energiya olib keladigan suvosti kabellaridan foydalanishni kutayotganini aytdi, ammo dekabr oyining boshidagi “tarang” davrlar haqida ogohlantirdi”, deyiladi xabarda.

Gazetaning ta’kidlashicha, “Buyuk Britaniya bu qishda yoritishni davom ettirish uchun ko‘proq import qilinadigan energiya manbalariga tayanadi”.

Chorshanba kuni “Times” gazetasi BFY konsalting firmasining prognoziga tayanib, Buyuk Britaniyaning energiya to‘lovlari kelasi yilning boshida rekord darajaga yetishi mumkinligini aytdi.

Hafta boshidan Yevropada gazning birja narxi tez sur’atlar bilan o‘sib bormoqda. Dushanba kuni “Gazprom” “Portovaya” kompressor stansiyasida yana bir Siemens firmasi turbinasi ishini to‘xtatayotganini e’lon qildi, buning natijasida 27 iyuldan boshlab “Shimoliy oqim” gaz quvuri orqali yetkazib berish kuniga 33 million kub metrdan oshmaydi.

Buyuk Britaniyada yashash narxining oshishi millionlab uy xo‘jaliklariga ta’sir qildi. 1 apreldan boshlab mamlakatda gaz va elektr energiyasi uchun narx chegarasi 54 foizga oshdi. Bu qaror fevral oyi boshida gazning jahon narxlari keskin oshishi sababli qabul qilingan, biroq 1 apreldan kuchga kirdi. Britaniyalik iste’molchilar uchun energiya xarajatlari yiliga o‘rtacha 700 funt sterlingga oshgan.