Boysunda avariyali quduqni yopish ishlari boshlandi

15 avgust kuni Surxondaryo viloyatining Boysun tumanidagi "Mustaqillikning 25 yilligi" konida avariyali quduqni yopish bo‘yicha amaliy ishlar boshlandi. Bu haqda "O‘zbekneftegaz" ma’lum qildi.

Shu munosabat bilan "O‘zbekneftegaz" AJ boshqaruv raisi Abdug‘ani Sang‘inov, Boysun tumani hokimi Bahodir Shukurov va boshqa mutasaddilar konga borib, "Kofrun" qishlog‘i faollari hamda loyihada ishtirok etayotgan Xitoyning CNPC korporasiyasi mutaxassislari bilan uchrashdi.

Uchrashuvda avariyali quduqni yopish loyihasi doirasida amalga oshiriladigan ishlar va xavfsizlik choralari muhokama qilindi. Mahalliy aholi bilan ham suhbat o‘tkazildi.

Eslatib o‘tamiz, 2024 yil 1 sentyabr kuni kondagi 604-sonli quduqda burg‘ilash ishlari vaqtida texnologik jarayon buzilishi oqibatida vodorod sulfidi sizib chiqqan. Hodisa ortidan yaqin hududda yashovchi aholi xavfsiz joylarga evakuasiya qilingan.