Bangkokda sodir bo‘lgan yirik yong‘inda 27 nafar odam halok bo‘ldi

Bangkok shimolidagi pabda sodir bo‘lgan katta yong‘inda kamida 27 kishi halok bo‘ldi va yana 63 kishi jarohat oldi.

Bu haqda Reuters mahalliy hokimiyatga tayanib xabar berdi.

Manbaning so‘zlariga ko‘ra, 27 nafar jabrlanuvchining jasadi allaqachon topilgan va yana bir nechta odam kasalxonaga yotqizilgan. Yong‘in sababi tekshirilmoqda.

Dastlabki ma’lumotlarga ko‘ra, yong‘in elektr panelidagi qisqa tutashuv tufayli yuzaga kelgan. Guvohlar yong‘in boshlanganidan keyin portlash ovozi eshitilganini va xona tezda tutun va alanga bilan to‘lganini xabar qilishdi.

O‘t o‘chiruvchilar yong‘inni yarim soat ichida o‘chirishga muvaffaq bo‘lishdi, ammo bir nechta odam bedarak yo‘qolgan.

Agentlik ma’lumotlariga ko‘ra, favqulodda vaziyatlar xizmati yetib kelguniga qadar yong‘in butun binoni qamrab olgan edi.