AQSh qurol-yarog‘ zaxiralarini qayta tiklash uchun kamida to‘rt yil kerak bo‘ladi

Harbiy tahlilchilarning fikriga ko‘ra, AQShga Eronga qarshi harbiy operasiya va boshqa maqsadlarda sarflangan qurol-yarog‘ zaxiralarini qayta tiklash uchun kamida to‘rt yil kerak bo‘ladi. Bu haqda The Hill nashri yozmoqda.

Nashrning qayd etishicha, Eronga qarshi operasiyaning birinchi bosqichida AQSh harbiylari «juda katta miqdordagi o‘q-dorilar»ni sarflab yuborgan. AQSh Qurolli Kuchlari Markaziy qo‘mondonligi rahbari Bred Kuperning so‘zlariga ko‘ra, o‘t ochishni to‘xtatish vaqtiga kelib 13 mingdan ortiq yuqori aniqlikdagi qurol-yarog‘ vositalari qo‘llanilgan.

Strategik va xalqaro tadqiqotlar markazi (CSIS) tahliliga tayangan maqolada ta’kidlanishicha, AQSh o‘z ixtiyoridagi «Patriot» raketalari zaxirasining deyarli yarmini, «THAAD» majmualarining yarmidan ko‘pini va «Precision Strike Missile» raketalari zaxirasining 45% dan ortig‘ini ishlatib bo‘lgan.

Tahlilchilarning baholashicha, hatto Kongress tomonidan zarur moliyalashtirish ajratilgan taqdirda ham, arsenallarni qayta tiklash kamida to‘rt yil vaqtni oladi. Jurnalistlarning fikriga ko‘ra, Eronga qarshi keng ko‘lamli harbiy operasiyaning qayta boshlanishi bu muddatni yanada uzaytirishi mumkin.