Amerikaliklarning uchdan bir qismi AQSh va Eron o‘rtasidagi kelishuv avvalo Tehron uchun foydali deb hisoblaydi

AQShning 2519 nafar voyaga yetgan fuqarosi ishtirok etgan CBS News va YouGov tomonidan o‘tkazilgan qo‘shma so‘rov natijalariga ko‘ra, amerikaliklarning aksariyati AQSh va Eron o‘rtasidagi kelishuv Vashingtonga qaraganda Tehronga ko‘proq foyda keltirgan deb hisoblaydi.

Tadqiqotga ko‘ra, respondentlarning 37 foizi kelishuv Eron uchun ko‘proq foydali bo‘lganini aytgan. Faqat 22 foiz ishtirokchi esa undan asosan AQSh manfaat ko‘rgan deb hisoblaydi.

Shu bilan birga, so‘rov qatnashchilarining 78 foizi AQSh va Eron o‘rtasidagi mojaroni to‘xtatish tarafdori ekanini bildirgan. Atigi 22 foiz respondent Tehron yon berishlar qilmaguncha bosimni davom ettirish kerakligini qo‘llab-quvvatlagan.

Vashington Eronning yadro dasturini butunlay to‘xtata oldimi, degan savolga respondentlarning faqat 31 foizi ijobiy javob bergan. 69 foiz esa bunga erishilmagan deb hisoblaydi.

Bundan tashqari, so‘rov ishtirokchilarining 59 foizi yaqin oylarda Eron mintaqa uchun tahdid bo‘lib qolishi ehtimoli yuqori deb o‘ylaydi. 40 foiz respondent esa buning aksini ta’kidlagan.

Amerikaliklarning aksariyati mojaroning qiymatini ham shubha bilan baholagan: 69 foiz AQSh tomonidan sarflangan xarajatlar o‘zini oqlamagan deb hisoblaydi, 31 foiz esa buning aksini aytgan.

AQSh prezidenti Donald Trumpning Eronga nisbatan siyosatiga respondentlarning 36 foizi ma’qullov bildirgan, 64 foizi esa bu masaladagi siyosatini qo‘llab-quvvatlamasligini bildirgan.

So‘rovnoma 17–19 iyun kunlari AQShning 2519 nafar voyaga yetgan fuqarosi orasida o‘tkazilgan.