Эндиликда Исроил фуқароларининг Бирлашган Араб Амирликлари (БАА)га кириши учун виза талаб қилинмайди. Бу ҳақда БАА Ташқи ишлар вазирлиги маълум қилди, дея хабар бермоқда “Анадолу”. 

Вазирлик виза тартибини бекор қилиш ҳақидаги битимнинг тасдиқланган вариантини Исроилга юборган. Битим ўттиз кун ичида кучга киради. Шундай қилиб, БАА Исроил фуқаролари учун виза талабини бекор қилган илк араб давлати бўлди. 

БАА ва Исроил ўтган йилнинг 20 октябрида ўзаро визаларни бекор қилиш ҳақида келишиб олган эди. Исроил 22 ноябрда битимни тасдиқлади ва шу тариқа БАА фуқаролари учун виза бекор қилинди. 

Эслатиб ўтамиз, БАА ва Исроил расмийлари 2020 йилнинг 15 сентябрида АҚШ пойтахти Вашингтонда алоқаларни нормаллаштириш бўйича келишувни имзолаган эди.